Салдатлöн дневникысь

Великöй Отечественнöй… Сьöкыд, вир кисьтана 1418 лун да вой – буретш та дыра кыссис-ыпъялiс миян странаын Ыджыд войнаыс. Кымын сюрс морт cyвтic öружиеöн киын, медым дорйыны-мездыны Аймуӧс пеж вöрöгысь. На пиын и миян землякъяс, миян районсаяс, матö 7,5 сюрс морт сюртчис фронт вылö. Эз бокö коль и Кулöмдiнысь том зон Андрей Липин, кодлöн военнöй сьöкыд туйыс нюжалiс матö 7 во да вайöдлiс биöн ыпъялысь уна пельöсö – Кола кöджö, Заполярьеö, Чехословакияö и Польшаö. Вöрöгкöд воча водзсасьöм, жлеч пуляяслöн швичкöм, помтöг кынмалöм, тшыгъялöм – нинöм эз кусыньт повтöм коми салдатöс, сiйö тырвыйö пöртiс олöмö ас водзас сувтöдöм могсö, эз ичöт пай пукты Ыджыд Вермöм шедöдöмö. Эз öд прöста бергöдчы война вылысь морöс тыр наградаöн – Гöрд Звезда кык орденöн, коймöд степеня Слава да мöд степеня Отечественнöй война орденъясöн.

Андрей Иванович Липин, Ыджыд войнаса ветеран, талун абу нин миянкöд, но сы йылысь паметьыс пыр кежлö кольö матыссаяслöн, тöдсаяслöн сьöлöмын. Сылöн фронтöвöй сьöкыд туй йылысь паськыда висьталöны дневниксьыс босьтöм пасйöдъясыс.

«Армияö босьтiсны служитны 1941 вося август 21 лунö. Веськалi 296 номера Рытыввывса лыжнöй полкö. Учебка прöйдитiм Архангельск обласьтса Яграын. Полк разöдöм мысти индiсны разведротаö 31-öд торъя горнолыжнöй бригадаö. Бригадаса командирöн вöлi полковник Соловьёв, ротаса командирöн – капитан Каспер. Ротаö медсясö веськалiсны Вöлöгдаса, Архангельск обласьтса да Комиысь салдатъяс.

Январын миянöс нуисны Мурманскö, кысянь шыбитiсны Кола кöджö, Рытыв Лицалöн шуйга берегö. Медводдза боевöй крещение вуджим 1942 вося май 1 лунö 332-öд паса мыльк вылын. Прöтивник зырöдiс Лысая мыльксянь. Me сэки вöлi мöд номера пулемётчикöн, первойнас – менам матысса рöдня, чойлöн верöc Чаланов. Матö 70 морт кык сутки чöж кутiм джудждасö, эгö лэдзöй пырöдчыны вöрöглы, кöть сiйö варыш моз нёльысь уськöдчылiс. Дерт, тайö ичöтик вермöмыс эз коль воштöмъястöг – пöгибнитiсны ёртъяс, вöлiны и ранитчöмаяс. Кык сутки кутчысьöм бöрын миянöс вежис батальон.

Рöспута вöсна ротанымöс вуджöдiсны мöдлаö, Рытыв Лицалöн веськыд берегö, кöнi пыр жö кутiм оборона. Разведчикъяслы дыр пукавны палаткаясын прöтивник эз сет. Да и ковмылiс аслыным водзмöстчыны, тöдмавны, мый вöчсьö вöрöглöн позйын. Миян мог – пырöдчыны на ордö, босьтны пленö немечöс да сы пыр тöдмавны ставнас серпассö, а сэсся виччысьтöг пасьвартны-бырöдны врагöс. Некутшöм поводдя – турöб ни веж кöдзыд, пемыд арся вой ни шляча зэр – нинöм эз торк миян салдатъясöс тайöс вӧчöмысь.

Гожöмнас, жар июльса пöраö комбриг ceтic задание босьтны пленö вöрöгöс. Разведка пöpтic могсö некутшöм воштöмтöг, вайöдiс нёль немечöс, содтöд радиостанция босьтöмöн. Арнас рота водзын сувтöдiсны мог штурмуйтны да бырöдны прöтивниклысь Карквайвыш нима ёнмöдöм пункт. Но ставнас пасьвартны эгö вермöй прöтивниклöн отсöг матыстчöм вöсна. Ковмис бöрлань сетчыны. Дерт, öти «кывйöс» вайöдім жö. Тöлысь дас мысти тайö жö мыльк йылас, вöрöглöн мышкас, кытi мунö медшöр туйыс, лöсьöдім засада. Водз асывнас немечьясыд куимöн буретш сэтчö вöлöн локтiсны пес вöчны. Öтикыс чеччис телегасьыс, босьтчис пу пöрöдны. Сэк сiйöс и босьтiм. Мöд кыкыс казялiсны миянöс да пышйисны. Опорнöй пунктсянь миянлы паныд восьтiсны миномётысь би. Бур, асъя руыс сайöдіс миянöс, ставöн дзоньвидзаöн бергöдчим. Прöтивник пöвстö татшöм уськöдчылöмыс разведчикъяслöн лыдтöм вöлi.

Июнь 26 лунö Кокша-Ярв районын веськалiм вöрöглöн кытшö. Фашистыд мылькъяс вылö пукталöма миномётъяс. Ковмис водзсасьны гранатаясöн. Тайö ёсь тышас пöгибнитiсны 2-öд взводса командир лейтенант Апресов да сержант Иконников. Вöлiны и ранитчöмаяс. Разведчикъяслöн неыджыд котыр орöдiс немечьяслысь кытш и ставнысö петкöдiс вöрöглöн ки улысь, нöшта 6 прöтивникöс аскöдыс босьтöмöн.

1944 вося март 7 лунö миян салдатъяс бара веськавлiсны кытшö. Танi тöдчымöн на ыджыд косьяс артмисны. Фашистъяс зiлисны пöдтыны роч боецъясöс. Ковмис миянлы ичöтик котыръясöн петны налöн кабыр улысь, водзсасьны став вын пуктöмöн. Кытшысь петiгöн уна ёртöc воштiм.

Öтчыд арся пöраö немечьяслöн ныр улын вöчим засада. Найö, тыдалö, миянöс казялöмаöсь да уськöдчисны понъясöн. Ковмис восьтны би, но эз дыр кежлö. Босьтiм öти вöрöгöс пленö и бöр асланым линияöдз тöвзим. Дерт, эз кокни вöв: ковмис кыскыны ранитчöм Корзниковöс. Рöкыд вылö, сэки жö кувмöн доймис сiйöс кыскысь Сергей Кривоборский, прöтивниклöн пуляыс суис да. Миян условиеясын, гöраясын, да кöдзыд, турöба поводдя дырйи, разведкаö петавлiгöн ранитчöмаясöс эз кокни вöв вайöдны бöр местаöдз — колiс нöсилкаöн кыскыны 50-100 километр. На пиысь гежöда кодi волiс ловйöн сьöкыд кузь туй вуджöм бöрад.

Коркö воис кад фронтлöн миян участоклы вуджны наступлениеö. Сизим сутки чöж мунiм гöраяс пыр кытшола туйöд, паныдалiм прöтивникöс Норвегияö да никелевöй рудникъясö пырöмысь. Миян ичöтик разведрота узьöм ни шойччöм эз тöдлы, водзсасис вöрöгкöд. Мыйта вын пуктiсны Заполярье, Петсоль, Ахмалахты, Салмиярвы, Керкенес дорйигöн.

Заполярье мездöм бöрын миянöс шыбитiсны Вöлöгда обласьтö выль войска дасьтöм могысь. И со 31-öд бригада кутö туй Польшалань да Чехословакиялань, воим Жумбергöдз. И танi разведканым эз янöд асьсö. 15 морта взводлы, кодöн веськöдлiс старшöй сержант Голубев, индiсны воöдчыны Одер сайö, прöтивниклöн тылö, кутны-ёнмöдны плацдарм миян войскаяс вотöдз. Но тайöс вöчны эз удайтчы. Миянöс прöтивникыд паныдалiс виччысьтöм гöсьтöс моз, пансис тыш. Но ас кадö воис отсöг, и удайтчис матыстчыны Одер дорö. Вöрöг эз виччысь миянлысь зырöдöмтö да босьтчис бöрыньтчыны, зениткаяссö эновтöмöн. Роч салдатъяс налöн кольöм öрудиеясöн жö вöтöдiсны найöс.

Сулалiм буретш Чехословакияын. Тайö вöлi 1945 воын, кор öтчыд асывнас штабса начальник подполковник Дроздин чолöмалiс ставнымöс Вермöм шедöдöмöн: Германия пö капитулируйтiс. Сы бöрын матö тöлысь джын на воюйтiм Шернерлöн котыркöд. Но и сылы воис пом. Неуна шойччыштöм мысти маршöн бергöдчим Львовö, сэсянь – Москваö. Та вылын военнöй туй эз на помась, нюжавлiс ciйö пöшти кык во, вайöдлiс Чукоткаöдз, кöнi и демобилизуйтiсны ставнымöс да лэдзалiсны гортö».

Г. НЕСТЕРОВА.

Парма гор, 2005, Рака 24 лун [24 марта] (36 №).